Vill Íslandshreyfingin strax í ESB?

Það er dálítið sérstakt fyrir nýgræðinga eins og mig í pólitíkinni að sjá hvernig fjölmiðlar meðhöndla ummæli manns í sjónvarpi. Því var slegið upp í tíufrettunum í gærkvöldi að Íslandshreyfingin vildi fara strax í ESB og það var haft eftir mér. Ég var sýndur segja að ég vildi aðildarviðræður á næsta kjörtímabili en sleppt var að sýna partinn þar sem ég listaði upp fyrirvarana fyrir aðildarviðræðum. En þetta var líklega gott skúbb að áliti fréttamannanna á RÚV.

Ég sagði í raunverulega ekkert meira um það hvort að við vildum inn í ESB heldur en Framsókn eða Sjálfstæðisflokkur. Þorgerður og Valgerður listuðu upp fyrirvarana og sögðu síðan að ef þeim yrði fullnægt þá væri aðildarumsókn inni í myndinni. Þórunn frá Samfylkingu gerði eins og þeim í Samfylkingunni er siður að slá í og úr og gefa ekki afdráttarlaust svar og ég veit ekki alveg hvar þessi þarna í Frjálslyndum var. Ég ákvað bara að snúa svarinu við og í stað þess að telja alla fyrirvarana upp fyrst og síðan að segja að við vildum aðildarviðræður ef þeir gengju upp þá ákvað ég að setja afstöðu okkar skýrt fram.

Við viljum skoða að fara í aðildarviðræður á næsta kjörtímabili sem þýðir auðvitað að við viljum fara í viðræður. En fyrst verður að taka til eftir núverandi ríkisstjórn og ná tökum á hagstjórninni, lækka vexti og ná niður verðbólgu. Við verðum líka að fara í aðildarviðræður með skýr markmið varðandi eignarhald á auðlindum okkar og vernd á íslenskum landbúnaði. Eins verðum við varðandi samningsmarkmiðin að hafa samráð við hagsmunaaðila í sjávarútvegi, iðnaði, viðskipta og atvinnulífi. Fyrr getum við ekki gengið til viðræðna. Og síðan ef viðræðurnar skila árangri fær þjóðin auðvitað að greiða atkvæði um aðild. 

Við verðum að gera okkur ljóst að fyrr eða síðar munum við standa frammi fyrir því að EES samningurinn verður okkur ónýtur. Þessvegna er óráð að sitja á rassinum og bíða eftir því að það gerist og þá að gera eitthvað. Það er betra að setjast að samningaborði meðan EES er í fullu gildi og við erum upprétt en eftir að hann er ónýtur og við þurfum að komna skríðandi að samningaborðinu.  

Athugasemdir

[Sigurjón Þórðarson, 11.4.2007 kl. 11:01]

Ég gat ekki betur í sjónvarpsviðtali  en að Ómar Ragnarsson í sjónvarpsviðtali  vildi ekki breyta kvótakerfinu.

[Lárus Vilhjálmsson, 11.4.2007 kl. 12:10]

Nei, stórbreytingar á kvótakerfinu eru ekki á dagskránni að sinni. Frjálsar veiðar krókabáta og verndun á viðkvæmum svæðum eru fyrst á dagskrá. Varðandi sjávarútvegsstefnu ESB þá verður að koma í ljós í aðildaviðræðum hvort að íslendingar geti fengið undanþágu frá henni. 

[Baldvin Jónsson, 11.4.2007 kl. 20:05]

Já merkilegt hvernig hægt er að slíta hlutina úr samhengi. Mér brá einmitt við að heyra þetta eins og þetta kom fram, virkilega ánægjulegt að skilja betur hvað við erum að hugsa um

[Sigurður Hrellir, 11.4.2007 kl. 20:16]

Stjórnmál eru full af málamiðlunum. Þegar stefnumál eru líka byggð á málamiðlunum er ekki von á góðu. Ég er ánægður með að Lárus hafi komið fram með afdráttarlausa skoðun þó svo að sumir séu henni ósammála. Mér hefur alltaf þótt það einkennilegt að ekki skuli láta á það reyna hvað Ísland gæti fengið út úr hugsanlegri ESB-aðild. Það er líklega höfuðástæðan fyrir því að ég styð ekki VG lengur.