ALCAN fer í felur

Það vakti athygli mína þegar ALCAN dreifði áróðursbæklingi sínum inn um lúguna hjá mér fyrir helgina að álverið heitir núna aftur ÍSAL. Frá því að álverið var byggt í Hafnarfirði 67 þá var það annaðhvort kallað ÍSAL eða álbræðslan en síðan ALCAN keypti verksmiðjuna á síðasta áratug hefur markvisst verið unnið að því að allir gleymi ÍSAL enda stendur það fyrir Íslenska Álfélagið . Þannig var ekki orð um ÍSAL á vefjum ALCAN hvorki hér heima eða erlendis þar til nú fyrir nokkrum dögum að allt í einu heitir fyrirtækið ISAL Reykjavik í stað ALCAN Iceland. AÐ vísu láðist að breyta nokkrum PDF skjölum þannig að þar heitir fyrirtækið ennþá ALCAN Iceland.

En hvernig stendur á þessu? Þarna er nátturulega verið að beita aðferðum auglýsingafræðanna. Líklegast er að rýnihópur, sem er hópur karla og kvenna sem pæla í ímynd ALCAN, hafi komist að þeirri niðurstöðu að nafnið ALCAN hefði ekki nógu jákvæða ímynd með tengingu við fjölþjóðlega starfsemi og því væri betra að nota þjóðlegt heiti sem hefði líka jákvæða mynd í hugum Hafnfirðinga. Og hvað var betra en gamla nafnið ÍSAL.

Það vakti líka athyglina hve konur voru áberandi í áróðursbæklingnum. Rýnihópurinn hefur líklegast komist að því að konur væru líklegri til kjósa gegn stækkun og því um að gera að vinna þær á band ALCAN. Enda lítur bæklingurinn út eins og Mannlífsblað með þykkum og vönduðum pappír og glæsilegum ljósmyndum.

  

Athugasemdir

[Guðmundur Ragnar Björnsson, 18.3.2007 kl. 11:02]

Sæll Lárus

Ég reikna með að blaðið sem þú ert að tala um séu Ísaltíðindi. Ef svo er þá hefur aldrei verið breytt um nafn á því blaði þrátt fyrir að Álverið hafi skipt nokkrum sinnum um nafn. Það er því ekki svo að nafninu á blaðinu hafi verið breytt í áróðursskyni en það kemur venjulega út 4 sinnum á ári og hefur gert í fjölda ára og er dreift til starfsmanna Alcan. Blaðið hefur alltaf verið mjög vandað og á fínum pappír þannig að ekker hefur breyst þar. Konur hafa verið mjög áberandi innan fyrirtækisins og sérstaklega á umhverfissviðinu og þar sem menn eru jú í kosningabaráttu afhverju ekki að spila á sína styrkleika. Er ekki VG alltaf að hamra á því hvað þar séu margar konur? 

[Lárus Vilhjálmsson, 18.3.2007 kl. 11:57]

Jú, jú ég veit að ÍSAL tíðindi hafa verið gefin út í áraraðir en þetta er í fyrsta skipti sem því er dreift í Hafnarfirði. Er það þá tilviljun að á sama tíma og blaðið er gefið út skuli harðir stækkunarsinnar fara að tala um ALCAN ÍSAL, ÍSAL er allt í einu farið að poppa upp í fréttatilkynningum og vefsíðum og síðast en ekki síst er nafn fyrirtækisins á Íslandi á alþjóðavef þess orðið ISAL Reykjavik í stað ALCAN Iceland? Eins og þú segir þá er ALCAN í kosningabaráttu og nota þessvegna öll meðul auglýsingaiðnaðarins og það var það sem ég var að benda á. 

[Guðmundur Ragnar Björnsson, 19.3.2007 kl. 19:59]

Sæll Lárus.

ISAL hefur oft verið notað innan Alcan yfir Alcan á Íslandi það er ekkert nýtt. Kíkti að gamni á Alcan facts frá 2005 og þar stóð ISAL Reykjavík þannig að Ísal nafnið hefur ekkert verið í felum og er varla dregið sérstaklega fram í auglýsingaskyni nema að takmörkuðu leyti. Ísal er vinnustaður þar sem jafnrétti er í hávegum haft og konur eiga fullt eins góða möguleika og karlar og fá sömu laun fyrir sömu vinnu. Þannig ætti það að vera allstaðar en er því miður ekki.