Take-Away áróður Kínverja á Íslandi

Það hljómar ótrúlega en þegar ég fór í gær að kaupa kínverskan á Duang Huang í Hafnarfirði þá færði brosmild afgreiðslustúlkan mér dvd disk um leið og hún færði mér matinn og sagði "Þú mátt eiga frá sendiráðinu". Eins og sannur íslendingur tekur maður alltaf fegins hendi ókeypis dóti þannig að ég þakkaði fyrir og fór. Ég kíkti svo á diskinn þegar ég kom út í bíl og sá að hann hét "The Dalai Lama" og grunaði eiginlega strax að þetta væri nú ekki komið frá Dalai Lama sjálfum.

Enda kom í ljós þegar ég þegar ég kíkti á diskinn heima að þarna var á ferðinni áróðursmynd sem réttlætti hernám kínverja í Tíbet. Þarna voru munkum og embættismönnum Tíbets fyrr á tíð lýst sem samviskulausum drápurum sem fláðu fólk lifandi og lögðu landsmenn í ánauð. Þeir voru síðan frelsaðir af hinum réttsýnu og góðu kommúnistum frá Kína. Síðan var Dalai Lama lýst sem strengjabrúðu í höndum breskra og bandarískra heimsvaldasinna.

Það er ljóst nú í aðdraganda Ólympíuleikanna í Beijing að kínversk stjórnvöld hafa sett í gang áróðursmaskínu sem á að draga hulu yfir þau mannréttindabrot sem viðgangast í Kína og í Tíbet. En það er þó von að úr rætist því heyrst hefur að bæði menntamálaráðherrann og viðskiptaráðherrann séu næstum því búin að snúa Kínverjum frá villu síns vegar. Og frú utanríkisráðherra er bara búinn að því hef ég heyrt.

Svo passiði ykkur næst þegar þið farið að ná í skyndibitann. Kannski fær maður næst skilaboð frá Bush um hið fagra Írak á Mac Donalds.

 

Athugasemdir

[Birgitta Jónsdóttir, 27.4.2008 kl. 09:09]

Þetta er alveg stórmerkilegt...!!! en alveg í anda kínversku áróðursmaskínunar. Ef ég voga mér að setja myndir inn á facebook sem tengjast Tibet og þeirra baráttu fæ ég yfir mig hafsjó heilaþveginna ríksistarfsmanna kínverska alþýðulýðveldisins sem hanga í commentakerfinu eins og lús sem erfitt er að losna við. Ég hef ekkert á móti kínverskum almenningi. Finnst samt skringilegt að fólk láti hafa sig út í að breiða út svona áróður fyrir ríkisstjórnina sína. Kæmi mér ekki á óvart að ótti sé þarna í grunninn.

[Jesús Kristur (IP-tala skráð) 27.4.2008 kl. 20:33]

Ég er svo aldeilis...

[Ævar Rafn Kjartansson, 27.4.2008 kl. 22:08]

Ég hef verslað mikið við þetta æðislega fólk.  Velt fyrir mér hversu mikið af kínverskum gestum væru oft þarna. Greinilegt að kínverska sendiráðið heldur þeim við efnið. Spurning hvort maður fái aðra þjónustu við að agnrýna kínverja?????? Og já í dótaboxum Macdonalds í Írak eru styttur af Bush að lesa bók. Á hvolfi.

[Ylfa Mist Helgadóttir, 27.4.2008 kl. 23:34]

Dísus!