Ruglfréttamennska

Hvaða rugl er að segja að meirihluti þjóðverja vilji markið aftur út frá skoðanakönnun þar sem þátt tóku eitt þúsund manns. Það búa yfir áttatíu milljónir manna í Þýskalandi. Ég held að Mbl ætti ekki að láta andstöðuna við ESB lita fréttirnar sínar svona kjánalega. Málefnalega umræðu takk fyrir.

Meirihluti Þjóðverja vill markið aftur

Lífinu ég þakka

Í dag er eitt ár frá því að ég horfðist í augu við dauðann en skjót viðbrögð lækna og hjúkrunarfólks Landspítalans og bænir fjölda fólks um allan heim gáfu mér lífið á ný. Það er við hæfi að minnast þess með línum úr ljóði chileönsku söngkonunnar Violetta Parra í þýðingu Aðalsteins Ásbergs. 

Lífinu ég þakka

það sem mér er gefið

þessi opnu augu

undur margt þau greina

svart frá hinu hvíta

sem og ljós í myrkri

 

Og hér syngur  tvífari minn Placido Domingo lagið.

 

Já, lífinu ég þakka  fyrir litlu afastelpuna mína, hana Emblu Sól.

 

 

 

 

 

Berjum helvítin

Nú er bara eitt að gera. Rífum IceSave samninginn  í tætlur í beinni útsendingu í sjónvarpinu og BBC kannski. Slítum stjórnmálasambandi við Breta og Hollendinga. Segjum upp EES samningnum, drögum til baka umsókn að ESB og segjum okkur úr NATO. Spörkum AGS úr landi og hættum í Norðurlandasamstarfinu. Stöðvum ferðir ríkisborgara Bretlands og Hollands  til landsins og þjóðnýtum  starfsemi fyrirtækja þaðan sem eru á Íslandi. Lýsum yfir einhliða eignarhaldi á Rockall svæðinu og Jan Mayen.

Sendum sendinefndir til Kína, Norður-Kóreu, Myanmar(Burma), Íran, Bólivíu og Venesuela og látum þau lána okkur pening og stingum í leiðinni upp á samtökum ríkja utan alþjóðasamfélagsins. Sendum Sigmund og Bjarna  til Rússlands með varnarsamning upp á vasann og leigjum rússum Keflavíkurflugvöll fyrir góðan pening.

Svo bíðum við bara í nokkra mánuði og þá verða allir orðnir vinir okkar.   

„Það er búið að semja!“

"Ég sagði ykkur þetta" ;)

Það er ánægjulegt að fá enn eina skýrsluna sem styrkir það sem Framtíðarlandið og fleirri hafa haldið fram um árabil. Arðsemi orkufyrirtækjanna vegna stóriðju á Íslandi er algerlega óásættanleg miðað við það tjón sem þau hafa valdið á náttúru landsins.

Oft  hefur verið bent á þetta t.a.m.  í  skýrslum atvinnulífshóps Framtíðarlandsins um Kárahnjúkavirkjun og um opinberan stuðning við stóriðju. Eins hafa greinar Indriða H. Þorlákssonar um efnhagsleg áhrif erlendrar stóriðju á Íslandi ítrekað bent á þetta.

Það er vonandi að stjórnvöld nýti  þessar upplýsingar  til að móta nýja orku og virkjunarstefnu sem byggir á sjálfbærni og virðingu fyrir náttúru landsins. Græn orkustefna er það arðsamasta sem hægt er að gera. 

 

 

Lítil arðsemi af orkuvinnslu

Hvaða rugl er þetta?

Það er með ólíkindum að núverandi sjávarútvegsráðherra ætli að standa við ruglið sem Einar K. setti af stað 10 mínútum áður en hann hrökklaðist úr embætti og sannarlega umhugsunarvert að það skuli vera formaður flokks sem kennir sig við umhverfismál. Á sama tíma og orðspor Íslands er í rústum á erlendum vettvangi ætla menn að hella olíu á eldinn og bæta hvalveiðum ofan á rústirnar. 

Það er annkannalegt að á sama tíma og ríkisstjórnin ætlar að hefja markvissa uppbyggingu í atvinnugreinum eins og t.a.m.  ferðaþjónustu og sjávarútvegi skuli sjávarútvegs og fjármálaráðherra bregða fæti fyrir þessar greinar á þennan hátt. Eins er það undarlegt að þegar það er bráðnauðsynlegt að endurreisa álit Íslands í umheiminum skuli þetta vera sett á dagskrá sem aðalefni erlendra fréttamiðla næstu vikur og mánuði. 

Menn geta fært rök fyrir því að hvalveiðar á Íslandi séu sjálfbærar og búi til nokkur störf. En hefur einhver mælt eða reiknað út kostnaðinn við þær í okkar helstu viðskiptalöndum þar sem andstaða við hvalveiðar er almenn meðal bæði almennings og stjórnvalda. Hefur einhver reiknað út hvað markaðsátak til að mæla hvalveiðum bót myndi kosta og eru hvalveiðimenn tilbúnir að greiða þann kostnað? Ég held að ráðherra og ríkistjórn ættu að að staldra við í þessu máli og skoða vel afleiðingarnar af þessum veiðum. Hrunið í haust var afleiðing áratuga rugls. Ekki er á ruglið bætandi

 

Hrefnuveiðar að hefjast

Grænt hagkerfi er framtíðin

Las um daginn mjög gott viðtal við Sigurð Gísla Pálmason athafnamann og framleiðanda Draumalandsins í Fréttablaðinu. Þar kemur hann fram með athyglisverðar hugmyndir um orsök efnhagshrunsins og kallar á nýja hugmyndafræði í uppbyggingu efnahagslífsins sem byggir á traustum siðferðislegum grunni.

Það er mikilvægt að eftir gjaldþrot gamla hagkerfisins í haust verði byggt upp nýtt hagkerfi á næstu misserum sem tryggi öllum atvinnu og verði ávísun á langtíma hagvöxt sem byggir ekki á sóun og ævintýramennsku. Setja þarf fram atvinnustefnu til framtíðar sem byggir á sjálfbærri nýtingu auðlinda, mannafla og fjármagns.

Innleiðing græns hagkerfis er besta leiðin til þess. Innan græns hagkerfis þrífst best menntun og frumkvöðlakraftur nýrrar kynslóðar. Leiðarljós græns hagkerfis er sjálfbær þróun sem þýðir að hagkerfið er byggt upp á þeirri meginreglu að nýting auðlinda, mannafla og fjármagns skili þeim í sama ástandi eða betra til næstu kynslóðar og svo koll af kolli. Þetta þýðir t.a.m. að nýting auðlinda verður að vera í sátt við náttúru landsins og komandi kynslóðir. Eins verður uppbygging atvinnu og mannlífs að tryggja öllum mannsæmandi afkomu og fjölbreyttum valkostum til menntunar og starfa. Nýting fjármagns til fjárfestinga má heldur ekki leiða til skulda sem næstu kynslóðir þurfa að borga.

Græna hagkerfið er engin klisja eða draumsýn fárra sérvitringa. Það er eina raunhæfa lausnin til að endureisa laskað efnahagslíf heimsins að mati margra helstu iðnríkja heims. Barack Obama, forseti Bandaríkjanna lagði fram í febrúar græna efnahagsáætlun sem á að skapa 5 milljón ný störf á næstu árum og ríkistjórnir landanna í ESB , Kina og Japan undirbúa svipaðar áætlanir. Það vekur furðu að einu stjórnmálaflokkarnir á Íslandi sem ætla að fylgja alþjóðasamfélaginu í þessa átt eru Samfylkingin og Vinstri Grænir meðan að Sjálfstæðisflokkur, Framsóknarflokkur og Frjálslyndir horfa enn til sovéskrar stóriðjustefnu sem sinnar endurreisnar í efnahagslífinu.

Með innleiðingu græns hagkerfis gæti Ísland verið í fararbroddi þeirra þjóða sem ætla að endurreisa hagkerfi sín á þeim grunni og jafnvel orðið skólabókardæmi og fyrirmynd um grænt hagkerfi. Við endurreisn íslenska efnhagslífsins er nauðsynlegt að horfa fram á veginn og grípa ekki til skyndilausna sem koma í bakið á okkur síðar eins og að nýta sjálfbærar orkulindir okkar í mengandi stóriðju. Endurreisn efnahags og atvinnulífs á Íslandi til framtíðar felst í nýju hagkerfi sem er sjálfbært og skapar ný störf þar sem menntun og sköpunarkraftur þjóðarinnar nýtur sín. Græna hagkerfið er framtíðin.     

Blekkingaleikur um Helguvík

Það er sorglegt að Sjálfstæðisflokkurinn og skjaldborgarar þeirra  skuli nú rétt fyrir kosningar reyna telja fólki trú um að álver við Helguvík eigi eftir að skapa þúsundir starfa. Það rétta er að Norðurál hefur engin tök á að fjármagna verkefnið og eins er áhugi móðurfélagsins  takmarkaður enda hefur álverð hríðfallið og sér ekki fyrir endann á því. Það eru heldur ekki neinir fjármunir í boði fyrir Orkuveitu Suðurnesja, Orkuveitu Reykjavíkur og Landsvirkjun til að byggja þær virkjanir sem þarf fyrir álverið. Eins og kannski menn muna þá er lánstraust íslendinga frekar bágborið um þessar mundir. Þarna eru því ekki að skapast nein störf í áliðnaði. Nær væri fyrir Suðurnesjamenn og stjórnmálamenn að einbeita sér að skapa störf í þeim atvinnugreinum sem hafa raunverulega vaxtarmöguleika eins t.d. ferðaþjónustu, hátækni og matvælaframleiðslu

Ef loforð Sjálfstæðisflokksins um 6.000  ný störf á næstu árum í stóriðju er eitthvað í líkingu við þetta rugl í Helguvík þá má spyrja sig hvaða blekkingaleik er verið að leika fyrir landsmenn. Er ekki nóg að við höfum þurft að súpa seyðið af 18 ára stjórn flokksins í efnahagsmálum.

Hundruð slógu skjaldborg um Helguvík

Veljum frambjóðendur sem vilja varðveita náttúru Íslands.

Nú um þessar mundir fara fram prófkjör stjórnmálaflokkanna og mikið mannval óskar eftir stuðningi til að sitja á framboðslistum þeirra. Það vekur vonbrigði að margir þeirra sem sækjast eftir fremstu sætunum hafa sýnt í orði og á borði að þeir meta náttúru landsins lítið og voru og eru tilbúnir að fórna miklum náttúruverðmætum fyrir uppbyggingu mengandi stóriðju. Þeir ætla ekki einu sinni að draga lærdóm af því að bygging Kárahnjúkavirkjunar og álvers í Reyðarfirði var einn af þeim þáttum sem leiddi til efnahagshrunsins nú í haust. Það væri stórslys ef þetta fólk yrði leitt til valda og mikil vá fyrir komandi kynslóðir.

Það er því mikilvægt að fólk styðji þá frambjóðendur í prófkjörunum sem hafa sýnt í verki að þeir eru vinir íslenskrar náttúru. Þeir frambjóðendur eru að vísu vandfundnir í Sjálfstæðisflokknum og Framsóknarflokknum en ég lýsi eftir kandidötum.

Það þarf víst ekki að efast um græna hollustu Vinstri-grænna en víst er að margir frambjóðendur Samfylkingarinnar  hafa átt í erfiðleikum með að standa fullkomlega við Fagra Ísland, kosningaloforð flokksins úr síðustu kosningum.

Þeir sem hafa þó reynt að standa við hin grænu loforð frá síðustu kosningum er fyrrum umhverfisráðherra, Þórunn Sveinbjarnardóttir, Dofri Hermannsson og Mörður Árnason og er vonandi að þau hljóti góðan stuðning í prófkjörinu.

Það má líka benda á nýtt fólk sem býður sig fram til starfa enda er nauðsynlegt að endurnýjun fari fram á Alþingi. Valgerður Halldórsdóttir úr Hafnarfirði er öflug kona sem leiddi baráttu Sólar í Straumi gegn stækkun álvers ALCAN í Straumsvík. Í Reykjavík má benda á Sigurbjörgu Sigurgeirsdóttur stjórnsýslufræðing og Skúla Helgason stjórnmálafræðing. 

Ég hvet alla þá sem vilja sjá framtíð þjóðar og lands  í góðum höndum að styðja þetta góða fólk í prófkjörum helgarinnar og hina til að sjá Draumaland Andra Snæs í næsta mánuði.

        

Nú ríkja skammtímasjónarmiðin

Það er sorglegt að horfa upp á svokallaða framverði umhverfisverndar í íslenskri pólitík, Vinstri Græna (með sína hörðu umhverfiverndarstefnu) og Samfylkinguna (með sitt Fagra Ísland) gefast upp fyrir algerum skammtímasjónarmiðum í efnahagsmálum okkar með því að leyfa hvalveiðar og veita álveri í Helguvík skattaívilnanir.

Það þýðir ekkert að skýla sér á bak við það að stjórnvöld neyðist til að taka þessar ákvarðanir vegna einhverra lagahártogana og kreppuástands.

Staðreyndin er sú að þessar ákvarðanir eiga eftir að hafa áhrif um langt árabil og nú strax er t.d ljóst að orkuþörf álversins kallar á virkjanir í neðri hluta Þjórsár og háhitaperlur Reykjanesskagans eru allar komnar á válista. Eins hefur komið í ljós að hvalveiðar íslendinga næstu árin eru nú strax farnar að hafa neikvæð áhrif á ferðaþjónustu og útflutning sjávarafurða.

Sumir segja að minnihlutastjórnin neyðist til að láta undan í þessum málum vegna þrýstings frá Framsókn, sem eins og allir ættu að muna vill helst búa til eitt stórt uppistöðulón á landinu fyrir álver í hverjum firði. Það er sorglegt ef þetta er rétt því þá er þessi stjórn að að gera það sem hefur einkennt íslensk stjórnmál síðustu áratugi, fórna hugsjónum fyrir völd.

Og þá er úti um einhverja siðvæðingu í íslenskum stjórnmálum. Þá situr þjóðin upp með sama gamla slektið sem talar á tyllidögum um hugsjónir og framtíðarsýn en fórnar því síðan fyrir stólana. Er það það sem við viljum?

      

Já., en enga pólitíkusa takk fyrir

Það er skondið að Framsókn skuli setja Stjórnlagaþing sem  skilyrði fyrir ríkisstjórnarþáttöku enda hamast þeir við það þessa dagana að gleyma ábyrgð sinni í íslenska efnahgshruninu. Halda þeir að fólk gleymi að þeir sátu í ríkistjórn með Sjöllunum í 10 ár þegar grunnurinn var lagður að hruninu. Ætla þeir að víkjast undan ábyrgð eins og flokkarnir allir hafa gert með einum eða öðrum hætti.

Stjórnlagaþing sem myndi gera breytingar á stjórnarskrá og öðrum stjórnskipunarlögum eins og t.a.m. kosningalögum er löngu tímabært en á því eiga ekki að sitja starfandi stjórnmálamenn. Á því eiga að sitja venjulegt fólk sem hugsar um hag almennings og sem vill breyta úreltu og spilltu stjórnkerfi flokkana í lýðræðislegt kerfi þar sem öllum gefst kostur á nýta sinn lýðræðislega rétt. Ný stjórnskipunarlög og stjórnarskrá yrðu síðan að sjálfsögðu lögð undir dóm þjóðarinnar í þjóðaratkvæðagreiðslu       

 

Kosið í vor og í haust?